Dili, 12 Maiu 2022 - Vise-Ministra Turizmu Komunitária Kulturál, Inácia da Conceição Teixeira, hamutuk ho Mercy Corps  hala’o lansamentu ba primeira katálogu ba produtu resiklájen hosi lixu plastiku, ne’ebé hala’o iha Sentru Informasaun Turístiku, Lesidere, Dili.

Eventu ne’e ho objetivu hodi haforsa negósiu lokál no promove Timor-Leste nia vizaun atu sai destinasaun turístiku ne’ebé kompetitivu ho respeita ba nia natureza ne’ebé furak no rikusoin kulturál nian, liuhosi lalenok ekonomia sirkular no utilizasaun plástiku ne’ebé responsável.

Iha lansamentu ne’e Vise-Ministra hateten “programa ida ne’e nu’udar meiu ida bele ajuda komunidade sira oinsá bele hetan oportunidade indústria kreativas bainhira utiliza lixu, kooperasaun ida ne’e ami senti katak, ema bele hare lixu la’os problema deit, maibé lixu bele sai solusaun bainhira ita bele buka dalan transforma nia ba ekonomia ne’ebé di’ak, liu-liu  ita hare fali ba Mikro Indústria sira liuhosi Artes Jenatus no industria kreativas, no ida ne’e  bele transforma fali ba familia kiik sira nia rendimentu no bele kria kampu traballu ba sira-nia an rasik”. 

Eventu ne’e inklui mós espasu ba espozisaun hodi oferese oportunidade koneksaun ba negósiu resiklajen lokál sanulu-resin-rua, ne’ebé bele halo interasaun direita ho partisipante sira no fa’an sira-nia produtu.