Sientista Xinés Deskobre Métodu Oinsá Hamoris Fali Esmalte Nehan

The Guardians, 30 Agostu 2019 - Fó sai katak sientista sira husi universidade Zhejiang, Xina, konsege deskobre métodu ida hodi hamoris filafali esmalte (enamel iha inglés) nehan nian. Esmalte nu’udar parte ida husi nehan ne’ebé wainhira hetan estragu ka dodok ona sei labele diak filafali. Maibe, sientista xinés sira hetan métodu ida ne’ebé bele provoka rejerasaun ba esmalte ne’ebé aat ona.

Tuir estatístika husi tinan 2016 nian hatudu katak iha ema purvolta 2.4 billoens mak iha problema ho nehan. Agora dadaun métodu ne’ebé mak iha hodi hadiak nehan sira ne’e ladun efisiente no halo pasiente sira ba hasoru bebeik dentista sira.

Sientista sira husi Xina ne’e hateten katak, sira dezenvolve métodu ida hodi prodús ‘calcium phosphate’, nu’udar komponente prinsipál esmalte nehan nian, ho diamétru 1,5 nanometru hodi bele insere ba nehan ne’ebé aat ona. Maneira ida ne’e halo kímika ne’ebé tau ba nehan refere sei metin no moris filafali hanesan parte normál ida husi nehan refere.

Ho métodu ida ne’e, sientista xinés sira hein katak iha tinan 1 ka 2 sei halo teste ba ema nia nehan wainhira teste iha laboratóriu hetan ona aprovasaun hosi guvernu Xinés.

Fonte: The Guardians

Notísia Hotu-Hotu >