Kazu Aimutin: Polísia Kaer Ona Autór Balun

Díli, 27 Setembru 2019 - Komandante Jerál Polísia Nasionál Timor-Leste (PNTL), Komisáriu Faustino da Costa no Segundu Komandante, Komisáriu Mateus Fernandes hala’o enkontru semanál ho Prezidente Repúblika, Francisco Guterres Lú Olo.

Iha Sorumutu ne'e Komisáriu Faustino da Costa atualiza situasaun seguransa iha rai-laran ba Xefe Estadu,  liuliu iha Kapital Díli, relasiona ho kazu konfrontus entre joven sira iha ai-mutin ne’ebé rezulta ema mate no asidente sira seluk ne’ebé akontese iha fulan ne’e nia laran.

Komandante Jerál PNTL hateten katak maske polísia kaer ona autór sira balu relasiona ho kazu Aimutin, maibé prosesu investigasaun kontinua la’o nafatin hodi bele hatene didi’ak kauza hosi konfrontus entre joven sira ne’e.

Aleinde ne’e, Komisáriu Faustino da Costa mós hateten: “Ho S.E. Prezidente-da-Repúblika, ami ko’alia asuntu ida artes marsias. Ne’ebé, ami mós informa ba S.E. Prezidente-da-Repúblika katak asuntu ida ne’e parte hotu presiza atu haree, la’os Polísia Nasionál Timor-Leste mesak mak atu halo saida ba parte ida ne’e”.

Komisáriu Faustino da Costa afirma Xefe Estadu kontinua enkoraza PNTL no husu PNTL kontinua halo nafatin nia servisu tuir lei no tuir regras ne’ebé iha.

Fonte: Mídia Presidente da República (PR)

Notísia Hotu-Hotu >