UNTL-FEJ Hala’o Peskiza Hodi Identifika Poténsial Turizmu Iha Venilale

UNTL, 26 Setembru 2019 - Universidade Naconal Timor Lorosa’e (UNTL) nia Fakuldade Ekonomia i Jestaun (FEJ), liuhosi Departamentu Turizmu (DKT), hala’o peskiza ho tema ‘Identifika Poténsia Turizmu iha Postu-Administrativu Venilale’, iha Postu-Administrativu Venilale, Munisípiu Baucau, ho apoiu husi Centro Nasionál de Investigação Ciêntifica (CNIC).

Peskiza refere utiliza métodu kualitativu no amostra respondentes hamutuk nain ruanulu resin lima (25) kompostu husi komponente haat, Lia-na’in sira, Konfisaun Relijioza sira, Autoridade Lokál sira, no Lideransa Komunitária sira, no aplika téknika entrevista hodi rekolla informasaun hodi análiza tuir mai.

Profesór Lucas de Sousa, Dosente iha Departamentu Komérsiu Turizmu iha Kampus FEJ nian, Díli, hateten katak peskiza ne’ebé hala’o ho objetivu atu buka deskobre importánsia kultura liga ho turizmu, importánsia turizmu relijioza, turizmu baze komunitáriu, ekoturizmu, i objetu turizmu naturál sira ne’ebé pertensa ba Postu-Administrativu Venilale, Munisípiu Baucau.

“Ami-nia peskiza ne’e atu haree no identifika potensialidade fatin turístiku sira hanesan turizmu relijiozu nian, maka estatua Nossa Señora Auxiliadora nian, iha parte Ariana, Suku Watuhaco, ne’ebé parte Igreja harii no komesa atrai vizitante doméstiku barak inklui internasionál sira,” dehan Profesór Lucas.

Peskizadór ne’e hatutan katak iha identifikasaun ba ekoturizmu nian maka fatin hirak ne’ebé iha hanesan bee-manas ne’ebé lokaliza iha Waikana, suku Badoho'o, no kuak hitu ne’ebé Militár Japaun sira halo iha suku Berkoli, inklui mós ponte-natureza.

Peskiza ne’e envolve investigadór UNTL nain tolu, inklui profesór FEJ Departamentu Komérsiu Turizmu, Profesór Lucas de Sousa, Profesór Francisco Vicente Guterres no Profesór Vicente Guterres.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >