Fundasaun Falur Rate Laek Fó Bolsu Estudu 18 Ba Timoroan

Díli, 27 Setembru 2019, Fundo de Desenvolvimentu do Capital Humano (FDCH) ho Fundasaun Falur Rate Laek halo serimónia despedida ho joven timoroan na’in 18 ne’ebé selesiona hodi hala’o sira ninia estudu iha Escola Profissional de Tondela no Escola Europeia de Ensino Profissional Manuel Rodrígues Suarez Braga, iha Portugal.

Sekretáriu Ezekutivu FDCH Sr. Isménio Martins da Silva husu ba estudante joven timoroan hirak ne’e atu konsentra iha sira nia estudu no FDCH apoiu sira atu ba hala’o sira nia estudu iha Portugal tanba timoroan hirak ne’e ba hala’o estudu iha area tékniku nian ne’ebé sei hatuur sira ninia futuru ida ne’ebé di’ak.

Prezidente Fundasaun Falur Rate Laek, Brigadeiru Jeneral Falur Rate Laek husu ba timoroan hirak ne’e atu kuda nafatin espíritu nasionalizmu nasaun foun ne’e nian iha sira ida-idak nia fuan hodi konsentra ba sira nia estudu.

Programa haruka timoroan sira ba hala’o estudu iha Portugal ne’e hahú iha 2014. To’o ohin loron Fundasaun konsege haruka ona joven timoroan na’in 50 resin. Husi númeru ne’e, bainhira sira termina sira nia estudu balun fila ona mai servisu iha Timor-Leste, balun hili kontinua sira nia estudu iha ensinu superior no balun hili halo servisu iha rai-li’ur.

Serimónia despedida ne’e hala’o iha salaun Centro de Conhecimento FDCH, ne’ebé hetan mós patisipasain husi inan aman sira, Eis-Embaixadora Timor-Leste ba Portugal, Maria Paixão, Promotora husi Uniaun Europea no responsavel sira husi Fundasaun Falur Rate Laek.

Fonte: Mídia Fundo De Desenvolvimento Do Capital Humano (FDCH)

Notísia Hotu-Hotu >