Gerson-Cidalia Kolabora Ho Leo Moniz Lansa Album SACARBIMUL

Díli 28 Setembru 2019 - Artista Timoroan nain-5, Gerson Oliveira, Cidalia Goncalves, Leo Moniz, Duviana Neves, no Gabriel Ramos hamosu tan album foun ho naran SACARBIMUL: Knanuk Murak, Dame iha Klamar - ne'ebé ofisialmente lansa ona iha Sábadu, 28 Setembru 2019 iha Jardim SEJD.

Lansamentu ne'e partisipa diretamente hosi Sekretariu Estadu Juventude no Desportu (SEJD), Nelio Isaac. Album SACARBIMUL ne'ebé produz husi Produtor Múzika, Donques Neves hetan apoiu fundus husi SEJD no produsaun CD hetan apoiu husi Mahanaim-Jenifer Foundation. Iha album ne'e hamutuk múzika 11.

"Parabens ba imi sira ne'ebe hamutuk hodi lansa múzika foun iha imi nia album, susesu ba imi hotu," dehan Sekretariu Estadu, Nelio Isaac.

Reprezenta hirak ne'ebe produz album refere, Gerson Oliveira hato'o agradesementu ba SEJD ne'ebe fó ona apoiu ba sira hodi bele produz album foun ne'e.

"Agradese ba apoiu SEJD ba album SACARBIMUL ne'ebe ami lansa ohin ne'e," dehan Gerson ne'ebé konesidu ho nia múzika Hau Persiza tebes O.

"Ami lansa album ne'e ho objetivu atu haburas múzika Timor-Leste ho diferensia paixaun foun iha múzika nasionál," Komentariu Donques Neves nudar produtór ba album refere.

Iha album ne'e, Gerson Oliveira kanta múzika 3 ne'ebé ida nia kanta mesak ho títulu Lorena Morena, no ida feat ho Cidalia Goncalves ho títulu Moris ida, Domin ida no seluk hamutuk ho Leo Moniz, artista foun rua Duviana Neves ho Gabriel Ramos ho múzika títulu Babadok ho Dame Natal.

Múzika seluk mak, Lemorai Do'ok ho Ema Kriatura kanta hosi Duviana Neves, Leo Moniz kanta tan múzika solo Ordem Lorico Aswain, Nicolau Lobato, no Papa. Múzika seluk Tauk Lakon O (Cidalia Goncalves) no Oan Kiak (Gabriel Ramos).

Gravasaun múzika album ne'e grava iha Alfa Home Studio Recording no Produsaun CD halo iha Natural Multimedia Production (NMP).

Fonte: Mídia Secretário Estado Juventude e Desporto (SEJD)

Notísia Hotu-Hotu >