PR Apoia Inisiativa Kuda Ai-Oan Husi Asosiasaun Prevensaun Mudansa Klimátika

Díli, 3 outubru 2019 - Prezidente Repúblika, Francisco Guterres Lú Olo, apoiu inisiativa husi Asosiasaun Global ba Prevensaun Mudansa Klimátika ba kuda ai-oan no husu atu koopera ho instituisaun relevante sira atu halo Timor-Leste sai matak.

Xefe Estadu husu atu Asosiasaun Global ba Prevensaun Mudansa Klimátika bele habelar liután Kampaña Nasionál “Sidadaun Ida, Ai-oan Ida” ne’ebé Prezidente Repúblika hahú tiha ona iha tinan ne’e.

Vise Diretór Asosiasaun Globál ba Prevensaun Mudansa Klimátika, Francisco da Costa Fernandes, informa katak ninian organizasaun preokupa ho mudansa klimátika ne’ebé sei ameasa ema hotu nia moris. Tanba presiza tau esforsu koletivu hodi kuda ai iha Timor laran tomak. Asosiasaun ne’e fó prioridade atu kuda ai iha eskola sira atu bele fó mahon ba estudante sira no iha áreas molik ne’ebé bele lori risku ba moris.

Atu bele halo Timor-Leste sai matan, tuir Francisco da Costa Fernandes, presiza uluk halo konsiensilizasaun ba sidadaun hotu-hotu importánsia kuda no tau matan ba ai-oan sira. Timoroan iha nia lisan rasik ne’ebé bele promove hodi haburas rai liuhusi tara bandu.

Asosiasaun Globál ba Prevensaun Mudansa Klimátika husu atu organizasaun kompetente bele fornese ai-oan atu bele kuda iha Dili, Baucau no Viqueque. Organizasaun prontu atu hola parte iha Kampaña Nasionál “Sidadaun ida, Ai-oan ida ne’ebé lidera husi Prezidente.

Fonte: Mídia Presidente da República (PR)

Notísia Hotu-Hotu >