Cristina Mendonça Husi Maubisse “Sai Prezidente Repúblika” Durante Oras Ida

Díli, 4 outubru 2019 - Cristina Aleixo Mendonça, estudante husi Eskola Sekundária Santo Inacio Loyola, Maubisse, hetan oportunidade osan-mean hodi “sai” Prezidente Repúblika durante oras ida nia laran nu’udar parte husi komemorasaun Loron Internasionál ba Labarik Feto iha 11 outubru.

Durante oras ida nia laran, Cristina Aleixo Mendonça, 14 anos, hala’o kna’ar nu’udar Prezidente Repúblika hodi utiliza eskritóriu Prezidente Repúblika hala’o reuniaun ho Chefe da Casa Civil, Adjunto Chefe da Casa Militar no Rede Feto Timor-Leste.

Cristina Mendonça hetan tratamentu espesiál ho akompañamentu husi Polísia Nasionál Timor-Leste ho karreta Prezidente Repúblika ninian no batidores tula husi uma mai Palásiu Prezidente Repúblika no fila fali ba uma iha Kuluhun, Dili.

Cristina Mendonça orgullu tebes bele hetan oportunidade ne’e ne’ebé parte ida atu tau matan ba dezevolvimentu feto nian.

Prezidente Repúblika, Francisco Guterres Lú Olo, iha ninian sorumutuk ho Cristina Aleixo Mendonça hateten katak simulasaun ne’e nu’udar parte ida atu hakbiit feto sai lideransa nasionál. Ho oportunidade ne’e sei loke dalan atu Cristina bele hatene kna’ar Prezidente Repúblika.

“Importante atu hakbiit labarik sira, tanba ne’e Estadu presiza kria kondisaun ba futuru rai ida ne’e. Estadu iha obrigasau atu kria kondisaun atu fó biban ba labarik feto sira sai matenek atu hadi’ak povu nia moris,” Prezidente Repúblika hateten.

Girls Takeover iha Loron Internasionál ba Labarik Feto nu’udar asaun ba mudansa sosial no polítika hodi halakon barreira sira ne’ebé diskrimina no prejudika labarik feto la dezenvolve an.

Girls Takeover fó oportunidade ba labarik feto hodi hala’o kna’ar oioin ne’ebé durante ne’e rona no haree de’it iha loron ida nia laran nu’udar parte ida atu ejize atensaun ba dezenvolvimentu labarik feto no feto foinsa’e.

Fonte: Mídia Presidente da República (PR)

Notísia Hotu-Hotu >