Fundasaun Oriente Entrega Ba UNTL Akordu Protokolu Kona-ba Bolsu Estudu Ba Prof. UNTL

Díli, 4 Outubru 2019 - Universidade Nacional Timor Lorosa’e (UNTL) nia Reitór Francisco Miguel Martins simu vizita kortezia (03/10) husi Koordenadora ba Delegasaun Fundacão Oriente nian iha Timor-Leste, Sonia Pinto da Fonseca, iha Gabinete Reitoria UNTL, Dili.

Objetivu husi enkontru refere mak atu entrega Akordu Protokolu ho Fundacão Oriente ba Universidade Nasionál UNTL.

UNTL no Fundacão Oriente asina ona akordu protokolu iha fulan agostu 2019 liubá iha Lisboa, Portugal, kona-ba bolsa de estudu ba Profesór UNTL sira hodi kontinua estudu iha nivel mestradu no doutoramentu nian.

Reitór hateten katak bolsa de estudu ne’ebé oferese husi Fundacão Oriente ba profesór sira UNTL nian hodi kontinua estuda iha universidade públika sira Portugal.

“Bolsa ne’e nia durasaun ba fulan 12 no prolonga tan ba fulan 12 iha programa mestradu, no fulan 36 ba programa doutoramentu,” tenik Reitór UNTL.

Entertantu Koordenadora Fundação Oriente, Sonia Pinto da Fonseca hateten katak relasaun entre UNTL ho fundasaun antes ne’e eziste ona entre instituisaun rua ne’e no bolsa de estudu oferese ne’e atu kapasita profesór sira UNTL nian ba formasaun sientífika no hadiak kualidade pedagójika iha universidade nasional publika nian.

“Bolsa ne’e mós inklui partisipa iha konferénsia internationál língua materna iha Países sira Língua Portugeza nian,” hateten Sonia.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >