Governu Japaun Konsidera Kanselamentu Viajen PR Ba Japaun Ne’e Asuntu Internu

Díli, 07 Outubru 2019 - Prezidente Repúblika, Francisco Guterres Lú Olo hasoru malu ho Enkaregadu Negósiu Embaisada Japaun iha Timor-Leste, Shingo Higashimoto, hodi transmite desizaun maioria Parlamentu Nasional ne’ebé vota-kontra nia planu viajen ba Japaun, hodi partisipa iha Serimónia Intronizasaun Imperadór-Foun, iha fulan-outubru ne’e.

Ba Shingo Higashimoto, Xefe Estadu hato’o nia agradesimentu no disponibilidade atu atende konvite ne’ebé nia simu maibé labele partisipa, tanba maioria Parlamentu Nasionál husi koligasaun Aliansa Mudansa ba Progresu (AMP), la aprova nia pedidu deslokasaun ba Japaun.

Xefe Estadu la espera dezisaun Parlamentu Nasionál ne’ebé hetan mós lamentasaun hosi timoroan barak, sosiedade sivil no relijiozu balu iha Timor-Leste.

Prezidente Repúblika respeita desizaun Parlamentu Nasionál nian no espera ho vontade ne’ebé timoroan barak hatudu hodi apoiu nia vizita ba Japaun, bele haforsa nafatin amizade no kooperasaun ne’ebé nasaun rua estabelese iha tinan-naruk.

Enkaregadu Negósiu Embaisada Japaun iha Timor-Leste, Shingo Higashimoto hateten Governu Japaun konsidera kestaun ne’e hanesan asuntu internu no espera estadu Timor-Leste bele rezolve ho di’ak situasaun ne’e iha tempu- badak.

Fonte: Mídia Presidente da República (PR)

Notísia Hotu-Hotu >