DEFORCA Sei Hasae Veteranus Nia-Oan Sira Nia Koñesimentu Kona-ba Kooperativa

Díli, 8 Outubro 2019 - Prezidente Repúblika Francisco Guterres Lú Olo halo enkontru ho delegasaun Fundação de Desenvolvimento de Formação e Capacitação (DEFORCA), ne’ebé lidera hosi nia Vise-Prezidente, António Ai-tahan Matak iha Palásiu Prezidensiál Nicolau Lobato, Ai-tarak Laran.

Iha sorumutuk ne’, DEFORCA aleinde husu Xefe Estadu nia apoiu, aprezenta mós vizaun no misaun fundasaun nian, ne’ebé sei foka iha formasaun no kapasitasaun kona-ba dezenvolvimentu ekonomia familiar.

Tuir António Ai-tahan Matak, alvu prinsipál formasaun maka ba veteranus no veteranus nia-oan sira, ho intensaun atu hasa’e sira-nia koñesimentu kona-ba kooperativa ho nune’e bele tulun veteranus sira hodi jere ho di’ak pensaun ne’ebé sira hetan hosi estadu.

Ba delegasaun DEFORCA, Prezidente Repúblika hato’o nia apoiu no enkoraza ekipa ne’e atu kontinua servisu hodi muda mentalidade konsumu ba mentalidade hatene produz.

Prezidente Repúblika husu DEFORCA atu transmite idea ne’e ba veteranus sira katak so ho produz mak sira bele dezenvolve no haforsa sira-nia an.

Fonte: Mídia Presidente da República (PR)

Notísia Hotu-Hotu >