Kanselamentu Viajen PR Ba Indonézia Sei La Fó Impaktu Negativa Ba Relasaun Bilateral

Díli, 08 Outubru 2019 - Iha audiénsia ho Embaixadór Repúblika Indonézia ba Timor-Leste Sahat Sitorus, Prezidente Repúblika Francisco Guterres Lú Olo ofisiálmente informa desizaun Parlamentu Nasionál hodi la autoriza Prezidente Repúblika atu halo vizita traballu ba Indonézia hodi partisipa iha serimónia tomada pose ba Prezidente Repúblika Indonézia Joko Widodo ne’ebé sei monu iha loron 20 Outubru 2019.

“Ha’u hakarak tebes partisipa iha serimónia tomada posse Prezidente Jokowi nian, maibé infelizmente Parlamentu Nasionál vota kontra viazen ida ne’e” hateten Lú Olo ba Embaixadór Sitorus.

Iha loron 1 fulan Outubru 2019, Parlamentu Nasionál vota kontra pedidu viajen Prezidente Repúblika ba Indonézia no mós ba Japaun.

Mezmu Prezidente Repúblika labele dezloka ba Indonézia hodi partisipa iha tomada pose ne’e, maibé Lú Olo salienta katak relasaun Timor-Leste ho Indonézia sei kontinua metin nafatin.

Lú Olo iha biban ne’e reitera fila-fali nia komitmentu atu implementa asuntu importante sira ne’ebé diskute ona ho nia omólogu Joko Widodo iha nia vizita estadu ne’ebé nia halo iha iha Juñu 2018.

Iha biban ne’e, Embaixadór Sitorus hato’o agradese ba PR Lú Olo ne’ebé hakarak komunika direita ba nia (embaixadór) kona bá kanselamentu viazen ba Indonézia. Sitorus haktuir katak ida ne’e jestu konsiderasaun no respeitu ba konvite husi nia Xefe Estadu.

Reprezentante Prezidente Indonézia ne’e mós haktuir katak nia parte komprende no respeita dinámika demokrasia iha Timor-Leste, tanba ne’e nia subliña katak kanselamentu viajen PR Lú Olo ba Indonézia sei la fó impaktu negativa ba relasaun bilateral Timor-Leste ho Indonézia.

Fonte: Mídia Presidente da República (PR)

Notísia Hotu-Hotu >