Iha Brisbane Hemu Bee Wainhira Lori Kareta Kona Multa $AUD 173

Brisbane – Hemu bee ka kafé wainhira lori hela kareta ne’e buat baibain ne’ebé ema barak halo lorloron, maibe ida ne’e kotra lei ka lae? 

Mane ida iha Brisbane kona multa $AUD 173 wainhira polísia hetan katak nia hemu bee aqua 600ml wainhira nia lori hela kareta.

Mane ho naran Brock Harris ne’e hafoin sai husi servisu atu ba uma, wainhira nia tama ba kareta laran nia detekta katak AC kareta nia la-funsiona. Iha momento ne’e loron manas los to’o 39 grau sélsiu.

“Hau para no hola tiha bee 600ml ida. Wainhira konduz fali kareta, polísia hapara tiha hau no dehan katak lori kareta mak hemu ho ne’e ilegál,” dehan Harris ba Rádio ABC Brisbane.

“Polísia sira dehan katak hau viola regra no la-konsentra ho diak wainhira lori kareta no fó multa hau $AUD 173 no hamenus pontu ida husi hau nia Karta Kondusaun”

“Sekarik ida ne’e kontra Lei, hau prontu atu selu multa. Maibe ida ne’e la-umanu se ita fó multa ba ema ida ne’ebé hemu be’e hodi labele idratadu iha temperatura 39 grau”

Relasiona ho akontesimentu ne’e, superintendente David Jhonson husi parte polísia Queensland hateten katak wainhira kondutór ida la-konsentra totál ba ninia viatura ka la konduz ho kuidadu maka nia halo tiha ona violasaun regra. 

“Uluk ba sira ne’ebé konduz la ho kuidadu, ami lori ba tribunal hodi tetu, maibé ohin loron ami fó multa kedas” dehan Jhonson.

Le'e notísia kompletu iha Inglés!

Fonte: Mídia ABC News

Notísia Hotu-Hotu >