EUA Taka Website Ilegál ba Pornografia Labarik Menoridade

EUA, 17 Outubru 2019 - Guvernu Amerikanu, liuhosi Ministériu Justisa, konsege hamate website hosi ‘darknet’ ka ‘net nakukun’ nian, tamba publika vídiu no imajén ho konteúdu pornográfiku hosi labarik menoridade sira nian dezde tinan 2015. 

Website ne’e jere hosi administradór ida iha Korea Súl, ne’ebé simu vizitante barak hosi mundu tomak. Vizitante ka utilizadór sira ne’e publika vídiu no imajén kona-ba labarik menoridade ne’ebé hetan abuzu seksuál ka halo aktu porno. 

Polísia Seguransa Sibernétika hosi EUA (Estadus Unidus Amérika) hahú operasaun hodi kaer kriminozu sira hosi website ne’e iha 2017. Maneira oinoin no ida mak buka tuir kriminozu sira ne’e liuhosi tranzasaun pagamentu hó bitcoin ne’ebé kriminozu sira uza hodi selu website ne’e, atu nune’e sira bele haree vídiu no imajén sira, nune’e mos bele upload rasik sira nia vídiu ka imajén ruma ba website ne’e.

Servisu Polisiál ne’e, konklui iha Outubru 2019 no konsege ka’er administradór no utilizadór barak ne’ebé durante utiliza website ne’e. EUA hala’o kolaborasaun hamutuk ho Guvernu Koreanu Súl, Grande Britániku no Alemaun hodi prosege kriminozu sira ne’e. Agora daudaun, prosesu kapturasaun la’o hela iha nasaun barak hanesan iha EUA rasik, Korea Súl, Brazil, Austrália, Itália no seluk tán.

Versaun Inglés kompletu bele le'e iha ne'e! 

Fonte: Mídia Tech Crunch

Notísia Hotu-Hotu >