Atleta Nain-60 Sei Partisipa Modalidade-12 Iha SEA GAMES Filipina

Dili, 15 Novembru 2019 - Primeiru-Ministru Taur Matan Ruak iha nia enkontru despedida ho atletas nasionál sira husu atu hatudu disiplina iha durante jogu SEA GAMES  ba dala 30º ne’ebé sei hala’o iha Filipina entre loron 30 fulan Novembru 2019 to’o loron 11 fulan Dezembru 2019.

Xefe Governu hato’o mensájen ne’e ba reprezentante atletas nasionál wainhira despede Xefe Governu sesta feira ne’e iha Palasiu Governu, antes atu desloka ba Filipina hodi tuir SEA Games 2019.

Iha despedida ne’e reprezentante atletas hetan akompañamentu hosi Ministru Edukasaun Juventude no Desportu, Dulce de Jesus, Vise Prezidente Komité Olímpiku Nasionál Timor-Leste no Prezidente Konfederasaun Timor-Leste, Xefe Governu hein katak atletas sira sei hatudu prestasaun di’ak hodi hamorin Timor-Leste nia naran iha jogu refere.

Timor-Leste lori modalidade 12 ba jogu SEA GAMES hanesan; futeból voleiból praia, siklizmu, atletizmu, natasaun (nani), tiru, boxe, taekwondo, karaté no silat ho atletas hamutuk na’in 60 hosi númeru ne’e feto 12 no ofisiál sira na’in 34.

Jogu SEA GAMES ba dala 30º ne’e, abertura sei hala’o iha loron 30 fulan Novembru 2019 no hetan partisipasaun atletas hosi Brunei, Kambodia, Indonézia, Laos, Myanmar, Filipina hanesan uma na’in, Singapura, Tailándia, Vietnam no Timor-Leste.

Fonte: Mídia Gabinete do Primeiro Ministro (GPM)

Notísia Hotu-Hotu >