TI-MOR-MIE No MDA Coslav Sei Reprezenta TL Kompete Iha Youth CO:LAB Kuala Lumpur

Dili, 6 Dezembru 2019 - Ministru Koordenadór Asuntu Ekonomia (MKAE) interinu, Fidelis Magalhães hola parte ba serimónia fo prémiu ba equipa sira ne’ebé manan kompetisaun Youth Co:Lab organiza husi Programa Nasoins Unidas ba Dezenvolvimentu (ka UNDP).

Iha klase Idea Inovativu ba negósiu, Ekipa TI-MOR-MI manan primeiru lugar nomos iha klase Empreza Foun “Start-up” fali MDA COSLAV UNIPESOAL, LDA mak manan. Ekipa rua-ne’e sai reprezentante Timor-Leste nian iha kompetisaun Youth CO:LAB ne’ebé organiza iha Kuala Lumpur, Malázia iha fulan Abril 2020 oinmai, husi UNDP Rejiaun Azia Pasífiku. Ideia inovativu sira-ne’ebé mos hetan prémiu sira seluk husi júri inklui ekipa TIESLA nomos ekipa RADCOLL AQUAPONICS. Konaba klase Start-up sira-ne’ebé iha ona hetan mos prémiu hirak ekipa CHAM’S WEERLING, LDA no ekipa THE ELVI’S AFORDABLE, FRESH AND HEALTHY.

MKAE-MTKI interinu fo parabéns bo’ot ba ekipas sira hotu ne’ebé pastisipa iha kompetisaun ida-ne’e no fó nia votus susesu ba ekipa-sira ne’ebé sai ona nu’udar representante emprezáriu foinsa’e sira Timor-Leste nian iha kompetisaun Forum nível rejional refere ne’ebé UNDP organiza iha Malázia.

Ministru Fidelis hato’o nia apresiasaun bo’ot ba UNDP nia inisiativa ne’ebé mos ba suporte hosi Embaixada Nova Zelándia, USAid nia programa Avansa Agrikultura no parseiru sira hotu hodi bele promove lideránsa, ideia inovativu sira no motivasaun empréndorismu iha Timor-Leste, tanba foinsa’e sira mos sai emprezáriu ho susesu hodi hasa’e Timor-Leste nia ekonomia, objektivus sira-ne’ebé mos hanesan priuridade governu nasaun nian.

Fórum Foinsa’e Timor-Leste ne’e mos hola parte hosi Reprezentante Residente UNDP iha Timor-Leste, Embaixadór Nova Zelándia, USAID Avansa Agrikultura, CCCI-TL nomos ajénsia governu balun ne’ebé MKAE interinu koordena, inklui representante TradeInvest no representante IADE, entidades sira-ne’ebé mos hola parte iha júri kompetisaun Youth CO:LAB refere.

Fonte: Mídia Ministério da Reforma Legislativa e Assuntos Parlamentares (MRLAP)

Notísia Hotu-Hotu >