Estudu Ba Kazu Risku Inundasaun Iha Sidade Díli

Díli, 28 Janeiru 2020 - Institutu ba Petróleo no Geologia (IPG) - Divisão Risco Geológico, halo estudu ba kazu inundasaun iha Díli foin lalais ne’e no identifika katak Kauza prinsipál husi inundasaun maka; kauza naturál no kauza sosiál. Kauza natural mak hanesan intensidade udan been ne’ebé maka’as ho nia durasaun kleur liu husi oras 1 (ida) nia laran. Kauza sosiál maka hanesan asentamentu industrial sira, ne’ebé konsiste barak liu ho pavamentu nune’e hamenus kuantidade infiltrasaun udan been nian ba iha rai-okos, impaktu sosial (umana) nian hanesan, halo/hari’i uma hodi blokeia trajetoria bee dalan no mota nian atu sulin, soe foer arbiru, sistema drainajen ne’ebé lá kompensa kuantidade udan been ho montante/kuantidade ne’ebé maka’as iha área sidade Dili, sedimentasaun ne’ebé maka mahar iha mota no kanál drainajen laran, no mós kanál drainajen (valeta) nia luan no altura ne’ebé lá sufisiente hodi akapta bee ne’ebé sulin, nune’e hamosu inundasaun.

Objetivu husi estudu ida ne’e atu, kria mapamentu área risku inundasaun, identifika, avalia no halo asesementu ba risku inundasaun iha sidade Díli, nune’e bele rekomenda no fo solusaun atu minimiza impaktu no okurensia husi inundasaun.

Rezutadu konkluidu katak risku inundasaun ne’ebé mosu iha sidade Dili bele minimiza. Solusaun no rekomendasaun ne’ebé bele konsidera hodi minimiza risku inundasaun maka hanesan Mantein nafatin drainajen ne’ebé maka ejiste ona, Monta rede barreira (kaptasaun ba material sedimentu sira husi mota), ba Inundasaun/bee sa'e mota presija halo kontrolu hodi hamenus sedimentasaun iha mota laran, halo fatin kaptasaun udan been iha uma idak-idak (hanesan bidon).

Uza sistema alerta sedu “Early Warning System” iha área sira ne’ebé maka ba risku Inundasaun/bee sa'e, presija mós haforsa kódigu ba konstrusaun (building code) sira, atu bele jere didiak populasaun sira ne'ebé hela iha área risku inundasaun nian.

Ba informasaun detallu bele kontaktu ka ba direitamente iha edifísiu IPG nian: + (670)3310179, Rua Delta 1, Aimutin, Comoro, Dili, Timor-Leste.

Fonte: Mídia Instituto de Petróleo e Geologia (IPG)

Notísia Hotu-Hotu >