SEFOPE-PNTL Kaer Autór Bosok Joven Sira Hatama Osan Hodi Ba Servisu Iha Rai-Liur

Díli, 29 Janeiru 2020 - Ekipa Sekretáriu Estadu Formasaun Profisionál no Empregu (SEFOPE) hamutuk ho Polisia Nasionál Timor Leste (PNTL) ka’er suspeitu ho naran inisiál FJF ne’ebé bosok joven Timor-oan nain 26 husi Munisípiu Manatutu hodi hatama osan másimu 1.100 no minimu 600, nune’e bele ba servisu iha Austrália.

Iha atuasaun ne’e Sekretáriu Estadu Julião da Silva to’o kedas iha komandu PNTL Munisípiu Díli hodi entrega supeitu ne’e atu investiga no rezolve tuir dalan legál.

Iha intervista Governante ne’e hateten, tinan hirak liubá ita deskonfia katak iha ema balun involve iha aktus krime, halo kobransa ilegál ba joven Timor-oan sira ne’ebé kandidatu atu ba servisu iha Austrália no Korea do Súl.

Nune’e Nia informa katak ita nunka halo ida ne’e, tamba ne’e kualker sé de’it mak involve iha aktus ne’e sei intrega ba Komandu PNTL Munisípiu Dili liuhusi PSIK hodi kontinua halo investigasaun nune’e bele hetan didi’ak aktus ne’e ninia hún mai husi sé no sé maka haruka halo ida ne’e.

Lider SEFOPE ne’e agradese ba Komandu PNTL ne’ebé konsege hetan ona suspeitu ruma deskonfia involve iha aktus ne’e, espera labele afeta tán ba iha kandidatu joven sira seluk, hanesan martires nia oan no oan ki’ak sira hotu.

Nia hatutan SEFOPE laiha akordu ida ho ajénsia iha ita nia rai laran, para rekruta sidadaun Timor-oan atu ba servisu iha rai liur. Provizoriumente Estadu liuhusi intituisaun SEFOPE de’it maka bele halo rekrutamentu, no mós ajensia ne’ebé husi Governu Austrália rekoñese maka bele halo rekrutamentu ba Timor-oan sira, maibe nafatin liuhusi SEFOPE.

Iha okaziaun ne’e Sekretáriu Estadu husu ba maluk joven sira hotu ne’ebé iha teritoriu Timor Laran, atu labele fiar ema sé de’it maka bosok hodi hatama osan atu ba servisu iha Australia no Korea do Sul, atu ba servisu iha fatin rua ne’e odomatatan ida de’it maka SEFOPE.

Agora daun-daun suspeitu iha ona sela preventiva komandu PNTL Munisípiu Dili hodi hein rezultadu investigasaun.

Fonte: Mídia Secretariado de Estado para Formação Profissional e Emprego (SEFOPE)

Notísia Hotu-Hotu >