Estudante UNTL Ho KGU Hala'o Interkámbiu Akadémika No Kulturál 2020

Díli, 05 Fevereiru 2020 - Universidade Nacionál Timor Lorosa’e (UNTL), liuhosi Proreitória Asuntu Kooperasaun (PRAK), realiza atividade interkámbiu entre estudante UNTL no estudante Kwansei Gakuin University  (KGU) Japaun, iha Auditóriu, Kampus Liceu UNTL.

Proreitór Asuntu Kooperasaun (PRAK) Eduardo Serão hateten katak atividade refere estudante sira hala'o interkámbiu konsentra iha parte akadémika no kultura.

“Sorumutu ohin ne'e, entre estudante UNTL no estudante hosi Kwansei Gakuin University (KGU) Japaun, mak partisipa interkámbiu ne’ebé hola parte ba atividade rutina kada tinan universidade hala’o. Objetivu atu tau hamutuk estudante sira, bele fahe esperiénsia no kompleta malu liga ba koñesimentu, desportu no kultura” hateten Proreitór Serrão.

Responsavél ba kooperasaun UNTL afirma katak iha prosesu interkámbiu universidade nasionál koopera ho universidade sira husi japaun no ensinu superiór oinoin iha mundu atu fó oportunidade ba estudante bele aprende liuhosi atividade interkámbiu.

Entretantu estudante Maria Pinto reprezentante husi Fakuldade Ekonomia no Jestaun (FEJ) hato’o katak liuhosi  interkámbiu refere, bele aumenta liután sira-nia kapasidade iha prosesu estudu nian. 

“Husi interkámbiu ne,e, ami bele aplika saida mak durante ne’e ami aprende iha banku universidade, tanba ida ne’e hanesan prátika. Nune’e agradese mós ba UNTL, ba oin bele koopera di’ak liután ho KGU”, afirma Maria.

Partisipa iha atividade ne’e estudante UNTL haat-nulu (40), estudante-KGU Japaun sanulu resin haat (14) akompaña hosi Proreitór Serrão no Jun Kukita.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >