Komboiu Velosidade Aas Ida Halai Sai Hosi Nia ‘Rail’ No Hamate Ema Nain Rua

Itália, 6 Fevereiru 2020 – Komboiu velosidade aas ida halai sai husi nia dalan ka ‘rail’ iha norte Itália provínsia Lodi, iha Kinta dadeer. Asidente ne’e akontese iha sidade Kazalpusterlengu, serka husi kilómetru 48 ba Milaun sudeste, no parte norte Itália. Tuir Brigada Inséndiu Italianu, kondutór komboiu na’in rua hakotu iis iha fatin, no na’in ruanulu-resin-ualu seluk hetan kanek. Ekipa emerjénsia husi bombeiru sira to’o kedas iha fatin hodi observa. Polísia Estatál Italianu hateten, sira halo hela investigasaun iha fatin asidente akontese.

Tuir informasaun ne’ebé hetan husi Rede Feroviária Italianu, komboiu ne’e hala’o hela viajen husi Milaun ba Salernu wainhira halai sai husi nia dalan besik estasaun Livraga, iha kuaze tuku 05:30 dadeer, oras fatin akontesimentu.

Tuir sítiu web ida husi rede internet, liña komboiu nian entre Milaun no Bolonha ne’e inaugura iha Dezembru 2008. Velosidade máksimu ne’ebé komboiu sira bele alkansa iha liña ne’e mak 300 km/h (186 mph). Seidauk hatene loloos, velosidade hira mak komboiu ne’e atinji molok asidente ne’e akontese.

Fonte: CNN

Notísia Hotu-Hotu >