Lere Konsidera Eleisaun Antisipada La’os Solusaun Ideál

Díli, 7 Fevereiru 2020 - Prezidente Repúblika Francisco Guterres Lú Olo hala’o sorumutu semanál ho Xefe Estadu Maior-Generál Falintil-Forsa Defeza Timor-Leste (F-FDTL), Majór-Jenerál Lere Anan Timur, hodi ko’alia kona-ba servisu Forsas Armadas no situasaun polítika rai-laran.

Kona-ba situasaun polítika rai-laran ne’ebé oras ne’e iha hela faze impase, Majór-Jenerál Lere Anan Timur, hateten, kompeténsia tomak iha Prezidente Repúblika nia liman hodi buka dalan oioin atu rezolve, maibé nia fiar dalan úniku atu nasaun sai hosi situasaun ne’e maka liuhosi diálogu no konsensu entre líder istóriku sira, liuliu, hirak ne’ebé mai hosi guerilla.

“Ha’u hakarak líder istóriku hotu tuur hamutuk hetan konsensu. Konsensu atu ultrapasa impase polítiku ida ne’e. Wainhira laiha konsensu, ita bele halo buat hotu-hotu mós, impase ne’e iha nafatin”, afirma Majór-Jenerál Lere Anan Timur,
Xefe Estadu Maior-Generál F-FDTL la konsidera eleisaun antesipada hanesan solusaun ideal, tanba rezultadu hatudu laiha partidu ida ne’ebé mak hetan maioria no laiha konsensu entre koligasaun partidu ne’ebé ukun, halo governu falla atu realiza promesa sira ne’ebé halo durante kampaña.

Enkontru ne’e akompaña hosi Brigadeiru Jenerál F-FDTL na’in Tolu: Domingos Raul “Falur Rate Laek”, João Miranda “Aluc Descartes” no Américo Ximenes “Sabika Besi Kulit”.

Fonte: Mídia Presidente da República (PR)

Notísia Hotu-Hotu >