Deputadu Sira Kestiona Rekrutamentu Pesoál Iha Instituisaun Estadu

Dili, 10 Fevereiru 2020 - Sekretáriu Estadu ba Komunikasaun Sosiál (SEKOMS), Merício dos Reis “AKARA”, partisipa iha Reuniaun Plenária Parlamentu Nasionál. Prezensa Sekretáriu Estadu ba Komunikasaun Sosiál iha plenária ne’e hodi rona preokupasaun hosi deputadu sira liuliu kona-ba kestaun sira ne’ebé relasiona ho ezisténsia husi Vírus Corona, bee moos, estrada, lixu iha sidade Díli no programa merenda eskolár hafoin halo fiskalizasaun iha terenu. 

Durante reuniaun plenária ne’e mós, Deputadu sira kestiona kona-ba rekrutamentu ba pesoál sira iha instituisaun Estadu no ezekusaun orsamentu duodésimu. Relasiona ho preokupasaun hosi deputadu sira, Sekretáriu Estadu ba Komunikasaun Sosiál afirma sei aprezenta ba iha Konsellu Ministru hodi buka solusaun. Iha biban ne’e mós, Bankada Parlamentár sira agradese ba apoiu hosi governu Nova Zelándia ne’ebé halo esforsu hodi evakua estudante timoroan sira iha Wuhan, Xina. 

Molok tama ba deklarasaun polítika husi Bankada Parlamentár sira no mós intervensaun husi Deputadu sira, Membru Parlamentu Nasionál hato’o uluk apresiasaun ba relatório fiskalizasaun hosi Komisaun C Finansa Públika ne’ebé hala’o iha Munisípiu Baucau, Bobonaro no Ermera no mós votu kongratulasaun ba Deliberasaun UNESCO ne’ebé institui 5 Maiu nu’udar loron Mundiál Lian Portugés.

Fonte: Mídia Secretário de Estado Para a Comunicação Social (SECOMS)

Notísia Hotu-Hotu >