Ministériu Saúde Iha Komitmentu Atu Elimina Malária Iha 2021

Dili, 10 Fevereiru 2020 – Ministériu Saúde (MS), liuhosi departamentu CDC (departamentu ne’ebé responsabiliza Moras Hada’et), organiza sorumutu ida ho programa Malária, iha Palacio das Cinzas Kaikoli, Díli. Enkontru ne’e lidera hosi Diretór Nasionál Polítika Kooperasaun (DNPK) hamutuk ho reprezentante Team Leader Expert Malária (TLEM) espesialista Malária Alan Schapira ho nia ekipa.

Objetivu hosi sorumutu ne’e, hodi ko’alia kona-ba External Team Meeting Review ba Programa Nasionál Malária hosi tinan 2017 to’o 2019, inklui halo avaliasaun kona-ba implementasaun programa eliminasaun malária iha Timor-Leste. Iha biban ne’e, Narcisio Fernandes hateten, kazu moras malária barak tebes iha tinan sanulu ba kotuk, no laiha kazu malária ne’ebé identifika iha tinan 2019.

Ho MS nia komitmentu katak iha tinan 2021 sei deklara eliminasaun moras malária iha Timor-Leste, nune’e, tuir planu katak ekipa sira sei halo vizita ba iha munisípiu sira no sei halo rekomendasaun ba MS hodi prioritiza programa ne’e, no mós planu estratéjiku sira ba tinan oin.

Sorumutu ne’e hetan prezensa husi Xefe Departamentu CDC, Gabinente Jurídiku, ekipa Teknolojia Informasaun (sigla Inglés, IT), Responsável Programa Malária, inklui bainaka seluk tan.

Fonte: Mídia Palácio das Cinzas

Notísia Hotu-Hotu >