UNTL Halo Kooperasaun Ho Camões Liuhosi Projetu FOCO

Dili, 10 Fevereiru 2020 - Reitór Universidade Nasionál Timor Lorosa’e (UNTL) Francisco Miguel Martins akompaña hosi Proreitór Asuntu Akadémiku Miguel Maia reuniaun ho Embaixadór Portugal iha Timor-Leste José Vieira ho Profesór sira iha Kampus Sentrál UNTL.

Sorumutu refere atu deskute kooperasaun bilaterál entre Camões, I.P. ho UNTL liuhosi projetu FOCO (Formar, Orientar, Certificar e Otimizar) hodi kontinua fó formasaun Língua Portugeza iha universidade nasionál.

Iha reuniaun refere Reitór UNTL hato’o boasvindas ba profesór nasionál no internasionál hosi Portugal ne’ebé sei hola parte iha projetu FOCO nian hala’o hosi Sentru Língua Portugueza (Sígla Portugés, CLP).  

‘’Agradese tebes ba prezensa Emabaisadór hodi fó hanoin ruma, liuliu kona-ba projetu FOCO. Projetu ne’e hodi haforsa ensinu língua portugeza ba estudante timoroan hodi aumenta kualidade no kompeténsia linguístika portugés nian no ba futuru nasaun ida ne’e nian”, hateten Reitór UNTL.

Nune’e, Embaixadór Portugal José Vieira apresia kolaborasaun ne’ebé hametin ona CAMÕES,I.P ho UNTL no espera katak profesór sira sei haforsa ensinu língua portugés iha UNTL. 

“Projetu kooperasaun ne’e importante tebes ba formasaun umana timoroan sira-nian, iha Língua Portugeza”, hatutan Embaixadór Vieira.

Profesór nasionál sanulu (10) no internasionál sanulu (10) maka hola parte ba Sentru Língua Portugueza (CLP-UNTL) hodi implementa projetu FOCO ne’e nia durasaun tinan tolu (2019-2022) ne’ebé finansia hosi UNTL no Camões,I.P.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >