EUA Prontu Asina Akordu Dame Wainhira Taleban Hamenus Violénsia

Afeganistaun, 12 Fevereiru 2020 - Estadus Unidus Amérika (EUA) no Taleban prontu realiza akordu hodi retira forsa EUA nian hosi Afeganistaun no hahú prevé hikas negosiasaun dame entre insurjente sira no governu Afegaun.

Maibé, tuir informasaun ne’ebé hetan hosi Ofisiál Osidentál ida, autoridade Afegaun ida no eis-Autoridade Amerikanu na’in rua, hateten katak, akordu ne’e sei implementa wainhira Taleban halo tuir promesa ida hodi hamenus violénsia durante períodu loron hitu.

Parte rua ne’e hamoris hikas planu promesa ne’ebé molok ne’e kuaze atu asina iha fulan Setembru liubá, ne’ebé ezije atu retira forsa EUA nune’e Taleban sei hakotu relasaun ho grupu terorista sira no hakat hikas ba dalan negosiasaun ba dame ho inimigu governu Afeganistaun nian.

Se akordu ne’e realiza, iha poténsia atu hakotu funu EUA nian ne’ebé ho durasaun kleur liu, hodi hahú halo negosiasaun direta ba dame entre Taleban ho governu Afegaun ba dahuluk.

Akordu ne’e sei fó pontu diskusaun ida ba Prezidente Donald Trump iha nia tentativa hodi reeleitu tan nu’udar Prezidente EUA, no sei permite nia atu argumenta katak nia kumpri promesa ida iha kampaña ne’ebé hateten, sei hapara funu “interminável” ne’ebé EUA halo iha esteriór.

Funu ne’ebé EUA halo iha Afeganistaun tinan sanulu-resin-ualu ona, nune’e sai hanesan funu ne’ebé ho durasaun tempu naruk liu no hamate ona kuaze soldadu rihun-rua-atus-tolu, tuir informasaun hosi Departamentu Defesa. Hosi Janeiru 2009, Nasaun Unidu (sigla Inglés, UN) hahú halo dokumentasaun sistemátika kona-ba vítima sivíl sira, to’o Setembru 2019, funu ne’e hamate ona sosiedade sivíl kuaze rihun-tolunulu-resin-haat.

Fonte: NBC News

Notísia Hotu-Hotu >