Foinsa’e 12 Sei Ba Servisu Iha Austrália Durante Tinan Tolu

Dili, 13 Fevereiru 2020 - Sekretáriu Estadu Formasaun Profisionál no Empregu (SEFOPE) liuhosi Diresaun Nasionál Empregu Esteriór (DNEE) asina deklarasaun ho joven timoroan nain sanulu-resin-rua (12) atu bele ba servisu iha Austrália liuhosi programa PLS iha salaun SEFOPE Kaikoli.

Traballadór sanulu-resin-rua (12) ne’e kompostu hosi feto rua (2) no mane sanulu (10) ne’ebé sei aranka iha Fevereiru nia laran no sei servisu iha área prosesamentu na'an iha kompañia Midfield Group.

Iha biban ne’e, Diretór DNEE Filomenu Soares hateten, objektivu asina deklarasaun ne’e atu bele kesi família ho governu, nune’e ba futuru mosu problema labele fó sala ba malu, tanba asina ona deklarasaun signifika katak prontu husik família tantu fen ka la’en.

Oportunidade ne’e mós Diretór Ezekutivu Planu Estratéjia Nasionál Empregu SEFOPE Aniceto Soro hateten, hanesan governu hato’o parabéns ba timoroan ne’ebé hetan oportunidade ba servisu iha programa ida ne’e. Nia hatutan Governu nia papél kria kondisaun no buka oportunidade hodi fasilita joven sira ne’ebé mak dezempregu iha ita nia nasaun bele hetan servisu iha rai-liur nune’e bele redúz númeru dezempregu. No husu ba servisu iha ema nia rain reprezenta nasaun Timor-Leste, tanbá ne’e servisu ho disiplina no responsabilidade, nune’e bele loke tan oportunidade ba maluk joven ne’ebé seidauk hetan servisu. No mós fó hanoin ba sira katak servisu tenki kuidadu aan tanba servisu iha ne’ebá ho makina de’it, kuandu la hatene tenki husu tuir ema ne’ebé hatene, se karik hetan asidente ruma hatudu ba ema hodi bele atende lalais.

Programa PLS hanesan programa foun ne’ebé hahú iha Governu da-ualu konstituisionál haruka traballadór timoroan sira ba servisu tinan tolu iha Austrália, dadaun ne’e traballadór hamutuk atus-ida-sanulu-resin-lima (115) servisu iha área ospitalidade, ortikultura no prosesamentu na'an.

Fonte: Mídia Secretariado de Estado para Formação Profissional e Emprego (SEFOPE)

Notísia Hotu-Hotu >