Kompañia Sacom Nia Dívidas Iha Governu Hamutuk Liu 22 Milloins

Dili, 24 Fevereiru 2020 - Primeiru-Ministru Taur Matan Ruak, segunda-feira ohin iha Palasiu Governu-Dili, simu iha audiénsia, Prezidente Grupu Sacom Energy Lda, Abilio Araújo, hodi ko’alia kona-ba dívida kompañia Sacom nian iha Governu liu dólar amerikanu 22 milloins ne’ebé Governu seidauk selu hotu.

Tuir Prezidente Sacom Energy ne’e katak, nia kompriende difikuldade Governu nian oras ne’e daudaun, maibé hein katak bele selu hodi kompañia bele asegura fornesimentu tuir mai, tanba kompañia iha kompromisu hakarak kontinua apoia Timor-Leste ba oin iha área enerjia nian.

“Ha’u husu enkontru ho Sr. Primeiru-Ministru. Mai ko’alia liuliu atu fó hatene de’it katak Kompañia Sacom enerjia agora daudaun ne’e, buka apoiu nafatin ita-nia rain, ita-nia Estadu ne’ebé hatama mina ba Betanu iha tempu Natal nian, litru juta 14, ne’ebé ahi eletrisidade lakan iha Natal to’o Ano Novo, horibainrua foin hatama tan litru juta 17, ne’ebé ahi agora sei lakan nafatin, maibé ha’u dehan ba nia katak, Governu seidauk selu hamutuk liu juta 22 dólar amerikanu, pois ha’u dehan katak kompriende difikuldade sira ne’e, mas ha’u dehan hare hela ba tanba ita sosa selu kedas i mai fornese selu tarde la hatene los nusa?” dehan Prezidente Grupu Sacom Energy Lda, Abilio Araújo.

Fonte: Mídia Gabinete do Primeiro Ministro (GPM)

Notísia Hotu-Hotu >