Labele Moe Hodi Ko’alia Sai Wainhira Hetan Síntoma Moras Kankru Susun

Díli, 25 Fevereiru 2020 - Espoza Prezidenti Repúblika (EPR), Cidália Guterres, sosializa moras kankru ba Estudane Universitáriu UNITAL Becora, Dili atu hasa’e koñesimentu kona-ba moras refere hodi hatene atu prevene.

Cidália Guterres haktuir katak realiza sosializasaun ne’e tanba preokupasaun ne’ebé boot liu ba inan feton no foin-sa’e sira atu hatene maka moras kankru susun ne’e saida, tanba konsidera feto nu’udar parseiru importante husi mane sira Iha sosiedade, liuliu iha sosiedade Timor.

EPR afirma katak, "Diak liu ita prevene duke ita kura", nune'e apela ba komunidade atu labele moe hodi ko’alia sai bainhira hetan síntoma sira kona-bá moras kankru susun.

Tuir EPR, dadus husi Komité Nasionál Moras Kankru katak maioria feto ne’ebé hetan moras kankru ne’ebé mate besik ema na’in-300 no sira ne’ebé konsulta liu ema na’in-800, seidauk sura feto sira seluk ne’ebé laiha asesu ba tratamentu saúde, maioria hetan moras kankru bainhira lori mai Ospitál barak la salva tanba daet ona ba isin lolon sira seluk. Tanba ne’e, sosializasaun ba moras kankru susun importante tebes atu komunidade hatene.

Xefe Departementu Sirurjia Ospitál Nasionál Guido Valadares (Sigla Portugés HNGV) haktuir katak, Jeralmente síntoma ba kankru susun nian maka hanesan katar, moras no susun sai mean, bubu hanesan fatuk, mudansa iha susun matan ka susun, mosu kafu’ak iha susun, bubu iha parte kalilin no síntoma seluk tan. Bainhira hetan síntoma sira hanesan ne’e husu ba inan sira atu bele ba lalais hetan atendimentu husi fasilidade saúde ne’ebé besik.

Espesialista nee haktuir mós katak, to’o agora seidauk identifika lolos kauza ba moras kankru susun, maibé iha fatór risku balun ne’ebé bele kauza kankru susun nian. Kankru ne’e prosesu abnormal ida ne’ebé akontese iha ita nia isin ho Fatór risku sira ne’ebé kauza maka hanesan, fatór jenétika, feto ne’ebé nunka kous, uza ai-moruk konstrasepsi, menstruasaun sedu liu ou tarde liu, dieta no mós istillu-da-vida.

Fonte: Mídia Gabinete Conjuge do PR

Notísia Hotu-Hotu >