UNTL Prepara Ona Ezemplar Livru 50.272 Ba Estudante, Dosente No Pekizadór Sira

Dili, 27 Fevereiru 2020 - Konjuntu Biblioteka Universidade Nasionál Timor Lorosa’e (UNTL) prepara ona atu kontribui ba apredizajen nível ensinu superiór ho ezemplár livru rihun-limanulu-atus-rua –hitulunu-resin-rua (50.272) hodi fó asesu ba referénsia no koñesimentu akadémiku foun iha área oin-oin, ba estudante inklui mós ba dosente no peskizadór sira.

Diretór Nasionál biblioteka, José Francisco Mendes, iha biblioteka Sentrál kompleksu INFORDEPE, hato’o ba estudante, dosente no peskizadór sira atu hakbesik ba konjuntu biblioteka iha UNTL. 

Konjuntu biblioteka UNTL inklui Biblioteka Sentrál, no biblioteka fakuldade sira hanesan, Biblioteka Fakuldade Medisina i Siénsia Saúde no Siéncias Sociais, Biblioteka Fakuldade Agrikultura, Fakuldade Direitu, Fakuldade Edukasaun Artes e Humanidades, Fakuldade Ekonomia e Jestaun no Biblioteka Fakuldade Enjeñaria no Teknolojia.

Aleinde ne’e iha biblioteka seluk ba área espesífiku sira inklui biblioteka iha Sentru Língua Portugeza, Biblioteka Sentru Nasionál Investigasaun Sientífika, Biblioteka Programa Pós-Graduasaun no Peskiza, Biblioteka Sentru Língua Ingleza nomós Biblioteka iha Uma America.

Estudante ne’ebé atu asesu biblioteka UNTL tenki tuir oras servisu nian, lori kartaun estudante, sira ne’ebe seidauk hetan kartaun bele aprezenta deklarasaun hosi departamentu, lee no bele empresta livru sira tuir regulamentu ne’ebé iha.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >