Udan Boot Rezulta Inundasaun No Hamate Ema Na'in-2

Dili, 14 Marsu 2020 - Hafoin akontese udan boot kuaze oras 4 iha kapitál Dili, Sexta-feira ne’e, hamosu inundasaun forte kuaze iha kapitál Dili parte Sentral no Lorosa’e nian.

Área sira ne'ebé afetadu maka’as mak iha Bekora, Bekusi, Bidau, Bemori, Kaikoli, Maloa no Prezidénsia Repúblika.
Hosi dezastre natural ne'e, mota lori ema na'in-lima (5), na’in-rua (2) mate no 3 konsege salva hodi lori kedas ba Ospitál Nasionál Guido Valadares (sígla portugés, HNGV).

Haree ba situasaun ne'e, Primeiru-Ministru Taur Matan Ruak, orienta kedas Ministru Obras Públika (MOP) no Sekretáriu Estadu Protesaun Sivíl (SEPS) tun direta ba terenu hodi halo evakuasaun emerjénsia ba vítima sira ne'ebé afetadu maka'as.

Vítima sira hamutuk na'in atus-ida-sianulu-resin-haat (194), kalan ne’e evakua kedas ba fatin evakuasaun tolu (3) ne'ebé SEPS prepara hanesan Igreja Bidau Mota Klaran akumula na’in 72, Sentru Operasaun Dezastre iha Bemori 80 no iha Sekretária Estadu Protesaunn Sivíl nia fatin 42.

Kalan ne’e MOP tun direita ba observa fatin sira ne'ebé hetan estragus maka'as hodi orienta IGE atu halo normalizasaun lalais, nune'e movimentasaun bele la'o normal fila-fali.

Fonte: Mídia Gabinete do Primeiro Ministro (GPM)

Notísia Hotu-Hotu >