Governu TL Iha Planu Ikus Atu Taka Portu Entrada Sira Hodi Impede Transmisaun Covid-19

Dili, 16 Marsu 2020 – Governu, liuhosi Vise-Ministra Saúde ba Kuidadu Saúde Primária no Ministra Saúde iha Ezersísiu, Élia A.A dos Reis Amaral, Vise-Ministra Finansa no Ministra Interina Sara Lobo Brites halo aprezentasaun iha Plenária Parlamentu Nasionál hodi atualiza kona-ba preparasaun Ekipa Komisaun ba Prevensaun Korona Virus iha Timor-Leste ne’ebé mak lidera hosi Ministra Saúde iha Ezersísiu ba preparasaun Timor-Leste iha prevensaun pandemia mundial ne’ebé afeta ona kazu ho númeru sa’e maka’as iha Ázia, Europa, Amérika no Meiu Oriente - nasaun dezenvolvidu sira hanesan Amérika, Japaun, Korea Súl, Fransa, Itália no España ne’ebé enfrenta dezafiu boot.

Aléin hosi ne’e, aprezenta mós rezultadu servisu ne’ebé mak Ministériu Saúde daudauk ne’e ho apoiu Ministériu relevante sira seluk hodi haree no prepara fatin karantina no izolamentu wainhira kazu ba Virus Corona mai iha Timor-Leste.
Nune’e mós Ministra Saúde iha Ezersísiu relata kona-ba Timor-Leste ne’ebé hetan kazu suspeitu nain 4 ne’ebé resultadu negativu maski nune’e Timor-Leste kontinua nafatin no tenki haforsa mekanismu kordenasaun ba prevensaun no kontrolu COVID-19.

Ministériu Saúde mós kontinua halo nafatin sensibilizasaun informasaun ba komunidade oinsá halo prevensaun la’os de’it ba pandemia mundial maibé mós ba virus sira seluk ne’ebé kauza ba saúde públiku.

Karik iha ema ruma mak hetan sintoma isin manas, me’ar no susar dada iis, favór fó hatene lalais kedas ba autoridade saúde iha área jeográfika, aeroportu, portu no fronteira.

Aprezenta mós opsaun balun ne’ebé inklui mós iha planu kontijénsia nian hanesan karik sai hanesan opsaun ikus liu mak taka porto entrada sira no mós LOCKDOWN iha Fatin Públiku hotu-hotu (Eskola, Merkadu, Parke – exseptu fasilidade saúde)
Ministra Finansa Interina hato’o kona-ba oinsá preparasaun Ministériu Finansa nian liga ho Orsamentu ba iha Planu Kontijénsia hodi responde ba iha kauza nasionál refere.

Fonte: Mídia Palácio das Cinzas

Notísia Hotu-Hotu >