Xefe Casa Civíl Agradese Ba Entidade Sira Ne’ebé Hamoos Palásiu Prezidensiál

Díli, 18 marsu 2020 - Xefe Casa Civíl, Francisco Maria de Vasconcelos, agradese apoiu hosi F-FDTL, PNTL, Institutu Jestaun Ekipamentu, Servisu Bee no Saneamentu, Bombeiru sira, Kompañia HAKSOLOK ho nia grupu, FOKUPERS, ACBIT, komunidade hosi Bairu-Pité, Joven sira hosi Bebonuk, Aimutin, Kampung Alor, Estudante Universiáriu sira, kompañia Globus Fuel, ACCTL, Aqua Fresca, ELEMLOI, Monteveado no Fabuldus, ne’ebé durante loron 5, hosi loron 14 to’o 18 marsu, ba hamoos resintu Palásiu Prezidensiál Nicolau Lobato ne’ebé afetadu hosi udan-boot no mota-sa’e, iha Bairu-Pité, Dili.

Ajudu ne’e hatudu solidariedade hosi komunidade, instituisaun sira seluk Estadu nian no kompañia oioin sira ho Prezidente Repúblika.

Ho orgullu, Xefe Casa Civíl hateten: “Iha situasaun susar nia laran, ita haree dala ida tan katak Timoroan sira hatene tulun malu hodi hakmaan sira ne’ebé presiza apoiu. Ajuda malu biar la koñese malu”.

Hosi kedas 13 marsu, sidadaun no instituisaun sira foti inisiativa hodi asegura ida-idak nia fatin no fó apoiu ba maluk sira ne’ebé presiza. Solidariedade ida ne’e hametin liu-tán relasaun ema ho ema no sei hakbiit liu-tán sentidu Povu, Estadu no Nasaun Timor-Leste.

Apoiu sira ne’ebé hetan husi komunidade no organizasaun sira ne’ebé temi iha leten mai-hosi inisiativa rasik atu bele hamoris fila-fali sidade Díli hanesan baibain.

Prezidénsia Repúblika tomak apresia no agradese inisiativa mai-hosi sidadaun ida-idak no entidade oioin nia apoiu atu hamoos resintu Palásiu no fatin sira seluk ne’ebé afeitadu hosi mota-sa’e.

Fonte: Mídia Presidente da República (PR)

Notísia Hotu-Hotu >