Tendénsia Akontese Udan Ho Intensidade Forte Akompaña Ho Anin Entre 20-21 Marsu 2020

Dili, 19 Marsu 2020 – Timor Leste Meteo Klima (Sigla Portugés, TLMC), tuir observasaun ne´ebé mak meteorolojista sira halo ho baze modelu meteorolójiku hanesan (GFS, ECMWF no modelu rejionál) nota katak iha probabilidade boot atu akontese udan ho intensidade forte no akompaña ho anin bo’ot entre 25-45 km/h iha teritóriu Timor laran tomak.

Área sira ne´ebé mak presiza atenta ba risku inundasaun, alagamentu no erozaun mak hanesan Dili (Kapitál Dili, Hera no Metinaro), Manatutu (Setor Norte no sentrál), Baukau, Likisa (Maubara), Same, Ainaru, Aileu, Ermera, Vikeke, Oekusi (Setor sentrál, Oeste no sul), Maliana, Kovalima no Lautem (Setor Norte, sentrál no Oeste)

Eventual ida ne´e iha probabilidade boot atu akontese tanba hetan influensia hosi “temperatura superfície do mar” iha tasi Timor ne´ebé mak atinzi to´o 31 graus Selsíus no eksesu anomalia pozitiva atinji pontu pozitivu +2.5. Sorin seluk mos tanba mudansa hosi padraun anin nian ne´ebé mak oras ne´e dadaun predomina hosi sudeste, favorese ba transporte de umidade hosi Tasi Timor mai teritóriu Timor-Leste.

Observasaun: Tempestade ka temporal ida ne´e sei fo risku bot ba komunidade sira ne´ebé mak hela iha área sira ne´ebé risku ba inundasaun, alagamentu no erozaun.

Ho razaun hirak ne´e maka TLMC husu ba komunidade sira ne´ebé mak hela iha fatin risku sira atu kontinua atenta ba eventual dezastre ne´ebé mak ita hotu la espera.

Fonte: Mídia MeteoClima Timor-Leste

Notísia Hotu-Hotu >