Mozilla Planeia Atu Hasai Protokolu FTP Hosi Firefox

Estadus Unidus Amérika, 19 Marsu 2020 - Kompania Mozilla anunsia planu atu halakon suporte ba protokolu FTP iha browser Firefox.

Enjeñeiru ba Software hosi kompania, Michal Novotny, dehan katak Mozilla iha planu atu dezativa suporte ba protokolu FTP, wainhira lansa versaun foun Firefox 77, ne’ebé sei lansa iha fulan Juñu tinan ida ne’e. Utilizadór sira sei nafatin asesu no download fixeiru liuhosi FTP, maibé presija ativa protokolu FTP iha preferénsia, iha pájina about:config. Maske nune’e, Mozilla eventualmente sei hasai hotu kódigu tomak ne’ebé mak suporta protokolu FTP iha Firefox, ne’ebé mak marka tena iha inísiu tinan 2021.

Novotny hateten katak kompania halakon suporte ba protokolu FTP ne’e tamba razaun seguransa. “FTP ne’e protokolu ne’ebé la seguru no laiha razaun atu hili preferénsia ba FTP (no la hili HTTPS) hodi halo download ba rekursus”. Entretantu, “parte balun husi kódigu FTP nian mos tuan los ona, la seguru no difísil atu mantein”, kompania mos identifika no hetan “bugs” ne’ebé barak iha pasadu.

Fonte: www.zednet.com

Notísia Hotu-Hotu >