SEFOPE: Timoroan Fila Hosi Rai-Li’ur Liuhosi Dalan Ilegál, Família Tenke Fó Hatene Estadu

Dili, 20 Marsu 2020 - Sekretáriu Estadu ba Formasaun Profisionál no Empregu (SEFOPE), Julião da Silva, hamutuk ho Komandu Operasionál PNTL, parte Imigrasaun no mós Ministériu Saúde, hala’o konferénsia pers iha salaun SEFOPE Kaikoli, ho objektivu, oinsá atu halo prevensaun moras Covid-19 ba timoroan hotu-hotu ne’ebé servisu iha rai-li’ur.

Liuhosi oportunidade ida ne’e, Sekretáriu Estadu ba Formasaun Profisionál no Empregu hateten, relasiona ho virus COVID-19 ne’ebé ohin loron afeita iha mundu, hakarak aviza ba traballadór, ka servisu na’in sira hotu-hotu iha Austrália, Korea Súl, Inglatera, Irlándia no mós nasaun sira seluk atu fila mai Timor-Leste tuir dalan legál.

Relasiona ho informasaun ne’ebé espalla iha mídia sosiál katak Timoroan balu ne’ebé fila hosi nasaun sira seluk mai Timor-Leste la liuhosi Imigrasaun, Aeroportu no mós fronteira terestre maibé liuhosi dalan ilegal, Julião da Silva husu família atu hato’o ba estadu.

“Ami husu ba familia hotu-hotu sidadaun idak-idak, ba iha públiku tomak se karik maka ita-nia família, ita-nia oan, feen, la’en ka ita nia subriñu, subriña sira ne’ebé maka fila husi servisu, iha ema nia rain, la liuhusi prosesu legál maibé liuhusi dalan ilegál, halo favor ida koopera, komunika ho ita nia sentru saude ka ita nia PNTL ne’ebé maka besik atu nune’e bele ajuda ita boot sira halo testi tuir prosedur ne’ebé maka Governu no Estadu fó sai ona”, dehan SEFOPE.

Ikus, SEFOPE kontinua husu ba sidadaun hotu-hotu atu koordena, koopera no kontribui ba Estadu no ba nasaun tamba liuhosi dalan ilegál bele prejudika no estraga nasaun.

"Karik ita boot sira komunika ho ita boot sira nia família liuhusi viatelefoníka hateten de’it ba sira atu bele liuhusi dalan ka odomatan ne’ebé legal, hanesan aeroportu tantu mós liuhusi ita nia fronterias terestere, nune’e ita-nia pesoál saude sira no imigrasaun, bele ajuda hodi atende ita boot sira”, Julião salienta.

Fonte: Mídia Secretariado de Estado para Formação Profissional e Emprego (SEFOPE)

Notísia Hotu-Hotu >