Taur Matan Ruak Halo Abertura Konferénsia Nasionál Arte Marsiál Kera Sakti

Dili, 21 Marsu 2020 - Primeiru-Ministru (PM) Taur Matan Ruak, ohin (21/3), halo abertura ba Konferénsia Nasionál Organizasaun Arte Marsiál IKS-PTL Kera Sakti, ne’ebé mak hala’o iha Salaun Luz Clarita, Dili.

Iha mensajen abertura ne’e , Xefe Governu apela ba organizasaun Arte Marsiál sira, liuliu Kera Sakti atu kontribui ba páz no estabilidade hodi kontribui ba prosesu dezenvolvimentu nasionál.

Taur mós husu ba responsável Kera Sakti atu ajuda Governu rezolve problema ne’ebé mosu internamente ka karik ho elementu hosi organizasaun Arte Marsiál seluk ho maneira diálogu.

Ikus liu, Xefe Governu fó parabéns ba inisiativa refere.

Konferénsia ne’e realiza, nu’udar rekezitu ida hosi LEI N.º 5 / 2017 de 19 de Abril, ne’ebé ko’alia kona-ba ‘REGIME JURÍDICO RELATIVO À PRÁTICA DE ARTES MARCIAIS, RITUAIS, ARMAS BRANCAS, RAMA AMBON E QUINTA ALTERAÇÃO AO CÓDIGO PENAL’, ne’ebé ezije estatutu Arte Marsiál sira nian tenke liuhosi konferénsia ruma, molok lori ba rejistu hodi ativa hikas, hafoin Governu revoga tiha Rezolusaun anteriór ne’ebé bandu atividade arte marsiál sira hanesan Kera Sakti, PSHT no KORK.

Reprezentante IKS-PTL iha Timor-Leste hateten, membru IKS iha Timor-Leste hamutuk rihun 40 molok Governu taka, no númeru ne’e seidauk atualiza fila-fali hafoin Governu taka Arte Marsiál tolu hanesan Kera-Sakti, PSHT no KORK.

Fonte: Mídia Gabinete do Primeiro Ministro (GPM)

Notísia Hotu-Hotu >