Pró-Reitór UNTL: Prosesu Aprendizajen Bele Kontinua Ho Distánsia Dook Via-Online

Dili, 23 Marsu 2020 - Universidade Nasionál Timor Lorosa’e (UNTL), liuhosi Pró-Reitór ba Asuntu Akadémiku (PRAA), Miguel Maia dos Santos, iha kampus sentrál UNTL, hateten katak atu prevene virus kontajioza Covid-19, hahú 24 Marsu to’o 14 Abril prosesu aprendizajen sira la halo ona ho aula prezensiál ka kontatu direta estudante no dosente iha aula laran.

“Desizaun ne’e universidade nasionál foti liuhusi reuniaun estraordináriu Konsellu Jestaun no Konsellu Xefia UNTL nian iha sesta-feira liubá hodi aplika modelu prevensaun Covid-19 liuhusi laiha aprendizajen (kontatu direta) no bele uza meiu longu-distánsia (via-online; Google Classroom, Sistema Easy class, youtube, Watsap no meiu seluk tan)”, hatutan PRAA.

Miguel Maia dos Santos salienta tan katak iha aula ne’ebé profesór no estudante sira la konsege hala’o hosi online, bele rekoopera bainhira situasaun normál fila-fali, no mós ba sivitas tomak nafatin atualiza informasaun ofisiál sira universidade nian bainhira iha mudansa ruma.

“Aleinde estudante no dosente, ba funsionáriu sira universidade nasionál atu feriadu temporáriu ka la’e, dadaun ne’e sei hein desizaun husi Konsellu-Ministru no Prezidente Komisaun Funsaun Públiku”, tenik Miguel.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >