PM Propoin Ba Konsellu Ministru Insentivu Ba Pesoál Sira Iha Liña Oin Hodi Luta Kontra COVID-19

Dili, 24 Marsu 2020 - Primeiru-Ministru (PM), Taur Matan Ruak, iha reuniaun Konsellu Ministru Extraordinária, Segunda-feira semana ne’e iha Sentru Konvensoens Dili (sigla portugés, CCD), propoin ba Konsellu Ministru proposta ida atu fó insentivu extraordinária ba pesoál saúde, Polísia, Militár no sira ne’ebé serbisu extra hamriik iha liña oin luta kontra pandemia COVID-19 atu virus ne’e labele da’et ba populasaun sira.

Ministru Reforma Lejizlativa no Asuntu Parlamentar (MRLAP), Fidélis Magalhães hateteh katak  Primeiru-Ministru afirma planu ida ba Konsellu Ministru atu fó insentiva no Konsellu Ministru konkorda atu avansa ho pakote ida atu hare’e kondisoins ba pesoál saúde, militar, polísia, ajénsia seguransa no hirak ne’ebé sei serbisu extra hodi fó protesaun ba ita hotu iha luta boot kontra COVID-19.

Konsellu Ministru apresía no endorsa proposta Primeiru-Ministru nian ne’ebé aprezenta no detalladu hosi proposta ne’e Xefe Governu sei aprezenta fila fali iha reuniaun Konsellu Ministru tuir mai.

Fonte: Mídia Gabinete do Primeiro Ministro (GPM)

Notísia Hotu-Hotu >