PR Sei Dekreta Estadu Emerjénsia Wainhira PN Aprova Ona

Dili, 24 Marsu 2020 – Atu prevene transmisaun Covid-19 hodi asegura ema hotu-hotu, Prezidente Repúblika (PR) Francisco Guterres Lú Olo, liuhosi Komunikadu Imprensa, hato’o mensajen hodi husu autorizasaun ba Parlamentu Nasionál (PN) nune’e, PR bele deklara Estadu Emerjénsia, bazeia ba pedidu hosi Governu.

PR simu ona proposta hosi Governu, iha loron 23 Marsu, kona-ba Estadu Emerjénsia. Iha loron tuir mai (24/3), PR konvoka kedas reuniaun ho karáter urjénsia ho konsellu Estadu no mós Konsellu Superiór Defeza no Seguransa, hodi rona opininaun favorável hosi konsellu konsultivu rua kona-ba Estadu Emerjénsia ho objetivu atu luta hasoru Virus Corona.

Hafoin enkontru, PR foti desizaun no haruka kedas mensajen atu husu autorizasaun hosi PN hodi deklara Estadu Emerjénsia. Wainhira PN aprova, Lú Olo sei deklara Estadu Emerjénsia liuhosi Dekretu Prezidensiál. Ho medida ida ne’e, Estadu tomak iha kbiit legál hodi luta hasoru COVID-19.

Deklarasaun Estadu Emerjénsia sei limita ka suspende direitu, liberdade no garantias balu ne’ebé mak konstituisaun fó ba sidadaun.

Fonte: Mídia Presidente da República (PR)

Notísia Hotu-Hotu >