Hahú Ohin Ba Oin Timor-Leste Bele Halo Rasik Teste 'Swab' Ba Moras Virus Corona

Dili, 25 Marsu 2020 - Vise-Ministra Saúde ba Kuidadu Saúde Primária no Ministra Saúde iha Ezersísiu, Élia Amaral, hamutuk ho Embaixadór Austrália ba Timor-Leste Peter Roberts, hala’o Lansamentu fatuk dahuluk ba konstrusaun Laboratóriu Patolojia no Mikrobiolojia, iha Laboratóriu Ospitál Nasionál Guido Valadares (sigla portugés, HNGV).

Hafoin lansamentu, Vise-Ministra hateten, nia parte agradese ba governu Australianu tanba koopera ona ho Ministériu Saúde (MS) hodi halo konstrusaun edifísiu Patolojia no Mikrobiolojia ne’ebé mak hetan apoiu másimu hosi Governu Austrália no povu Austrália, inklui mós apoiu balu oinsá mak atu halo inspeksaun ba iha fisiar nian atu nune’e bele halo servisu.

Élia Amaral hateten mós katak hahú ohin ba oin Timor-Leste bele halo teste 'swab' ba moras COVID-19 rasik. Wainhira liu 5-6, sei haruka nafatin ba Austrália hodi halo teste konfirmasaun maibé MS sei organiza nafatin ba fatin refere másimu liu tán.

Iha fatin hanesan, Governu Australianu Joshua Francis, hato’o parabéns no agradese ba ekipa tomak hosi Laboratóriu Nasionál, MS inklui ekipa sira seluk ne’ebé apoia no servisu maka’as atu kombate Virus Corona, no ekipa tomak kontraktor sira hotu sira nia parte sei nafatin koopera no servisu ho Governu TL liuliu MS atu suporta kapasidade hodi halo teste ba COVID-19 iha rai laran, no mós kontrola no kombate virus ne’e.

Governu Austrália mós fó apoiu Tékniku liuhosi Organizasaun Non-Governamental (ONG) atu suporta kapasidade halo teste iha TL, no mós suporta hodi hadi’a laboratóriu importante atu luta ba COVID-19,nune’e, sira prontu servisu nafatin hamutuk ho MS no grupu sira seluk atu suporta TL. Iha mós médiku espesialista balu hosi Austrália hodi apoia teste Laboratóriu no kontinua servisu nafatin tamba hakarak atu tulun TL livre hosi COVID-19.

Fonte: Mídia Palácio das Cinzas

Notísia Hotu-Hotu >