Pedro Belo Hateten OMS La Tulun TL Kombate Covid-19, PM Husu Deskulpa

Dili, 25 Marsu 2020 - Primeiru-Ministru (PM) Taur Matan Ruak, ohin, simu Koordenadór Rezidente Organizasaun Nasaun Unidu (ONU) iha Timor-Leste, Roy Trivedy no Reprezentante Organizasaun Mundiál ba Saúde (OMS), Rajesh Pandav, ne'ebé lamenta ba Xefe Governu kona-ba deklarasaun falta kuidadu hosi Komandante Operasionál Nasionál PNTL, Superintendente Xefe Polísia, Pedro Belo ne’ebé deklara ba Mídia ida, horisehik (24/3), katak OMS nia prezensa iha Timor-Leste hanesan projetu ida, no haree hosi parte seluk mós, iha pájina facebook mídia Nasaun Unidu iha Timor-Leste nian, hatuir katak Pedro Belo hateten “la kontente ho OMS [...] sira la ajuda governu atu kombate COVID-19”.

Hafoin simu tiha lamentasaun, PM aproveita hodi Governu Timor-Leste nia naran hato’o deskulpa ba OMS, hodi realsa katak deklarasaun refere la refleta Governu no Estadu Timor-Leste. Tamba ne’e Xefe Governu orienta ona Ministru Interiór Interinu atu orienta Komandante Jeral PNTL hodi toma atensaun ba Komandante PNTL sira ko’alia de’it iha sira-nia knaar ka área servisu.

Taur Matan Ruak akresenta, Governu iha konfiansa nafatin ba OMS no apresia tebes ba servisu OMS nian iha Timor-Leste ne’ebé daudauk ne’e ajuda tebes Governu liuliu iha luta kontra Pandemia COVID-19.
Entretantu Reprezentante Rezidente ONU agradese tebes ba asaun Xefe Governu nian hodi husu deskulpa atu labele interompe servisu hamutuk entre OMS no Timor-Leste ne’ebé durante ne’e iha ona.

Fonte: Mídia Gabinete do Primeiro Ministro (GPM)

Notísia Hotu-Hotu >