Prezidente RAEOA-ZEEMS Vizita Estudante No Komunidade Iha Fatin Akollimentu

Oekusi, 25 Marsu 2020 - Prezidente Autoridade RAEOA-ZEESM, José Luís Guterres vizita estudante no komunidade hamutuk na'in sanulu (10) iha fatin akollimentu ida iha RAEOA.

Autoridade RAEOA husu temporária akollimentu sira atu hadook sira hosi sira-nia família no komunidade, nune'e bele prevene hada'et Virus Corona (COVID-19) ba komunidade, no atu garante katak Oekusi tenke livre husi COVID-19.

"Intensaun Autoridade la'ós atu izola imi hosi imi-nia família atu labele halo interasaun ho família no komunidade. Ita-nia regra nasaun nian, tanba ne'e ami tenke halo ba akollimentu imi durante loron-15, no ofisiál saúde sira sei mai kontrola imi loron-loron no to'o loron ikus mak imi lá hetan sintoma ruma, sira sei autoriza imi atu fila bá imi-nia uma ida-idak. Autoridade iha obrigasaun atu tau matan ba imi to'o loron akollimentu ne'e remata", dehan Prezidente Autoridade.

Prezidente Autoridade dehan estudante kuaze atus-tolu (300) ne'ebé estuda iha rai li'ur. Tanba ne'e, autoridade RAEOA sei apoiu ba sira hodi aloka ba iha Sentru Akollimentu Temporáriu tolu ne'ebé autoridade prepara ona atu sai fatin akollimentu ba tantu estudante no komunidade ne'ebé sei tama iha RAEOA.

Prezidente Autoridade dehan komunidade labele pániku ba pandemia COVID-19, tanba komisaun instaladora sei sosializa COVID-19 atu komunidade komprende no oinsá prevene sedu hodi labele afeta.

Prezidente Autoridade fó hatene ba komunidade iha RAEOA atu hatoo ba autoridade lokál ka Komisaun COVID-19 RAEOA nian, karik família ruma ne'ebé foin fila hosi estranjeiru ka ema ruma ne'ebé iha sintoma COVID-19 hodi hetan lalais asisténsia médika.

Fonte: Mídia Zeems TL

Notísia Hotu-Hotu >