Diretora Servisu Saúde Manufahi Rejeita Informasaun Kona-ba Ema Ida Iha Same Suspeitu Covid-19

Manufahi, 26 Marsu 2020 – Diretora Servisu Saúde munisípiu Manufahi, Florência Tilman Corte-Real rejeita informasaun kona-ba komunidade Manufahi nain ida suspeitu ba virus Corona.

Diretóra Florência hato’o deklarasaun ne’e ba jornalista sira hodi rejeita informasaun kona-ba deklarasaun Primeiru-Ministru nian  iha Plenária Parlamentu Nasionál kinta-feira ohin (26/03) katak komunidade Manufahi nain ida detekta suspeitu Corona virus no ne’e la loos.

Diretóra Florência haktuir katak informasaun ne’e la loos tanba parte saúde rasik to’o oras ne’e hala’o hela karantina ba sidadaun Timor oan nain tolu hosi Manufahi ne’ebé foin fila hosi Indonézia, hodi observa hela durante loron 14  iha fatin izolamentu nian iha  Same no observasaun lao ona loron tolu (3) maibe seidauk detekta suspeitu ba virus Corona iha sira ruma.

Diretóra Florência husu ba públiku no komunidade sira iha Munisípiu Manufahi labele pániku ho informasaun ne’ebé dadaun ne’e espalla ona iha média sira tanba informasaun ne’e la loos no informasaun ne’ebé klaru sei fó sai hosi Saúde Munisípiu Manufahi.

Fonte: Jornalista Konjunta Manufahi (JKM)

Notísia Hotu-Hotu >