Atualizasaun Ba Kazu Covid-19: Suspeitu 46, Negativu 41, Pozitivu 1 no Provavel 4

Dili, 07 Abríl 2020 – Komisaun Sentru Integradu Jestaun ba Krize, ohin (7/4), liuhosi nia porta-vóz Rui Maria de Araújo, atualiza informasaun kona-ba kazu virus Corona iha Timor-Leste.

“Lokraik di’ak ba públiku tomak, ohin komisaun Sentru Integradu Jestaun ba Krize nia naran hakarak hato’o ba Timor-Leste laran tomak kona-ba evolusaun ba progresu hosi ita hotu nia esforsu atu prevene moras COVID-19, akumulativamente signifika dadus ne’ebé hahu tau hamutuk hosi fulan Fevereiru mai to’o agora ema ne’ebé ita supeita hatudu simtomas COVID-19 hamutuk ema na’in 46. Horseik mai too ohin aumenta tan na’in rua hosi sira ne’e iha na’in 41 maka negativu, ida mak komfirmadu la muda hahú kedas hosi loron 21 Marsu mai to’o agora no iha na’in 4 maka sei hein rezultadu laboratóriu nian”, informa Rui.

Porta-vóz ne’e hateten katak iha konfinamentu obrigatóriu, existe ema na’in-958. Hosi hirak ne’e, na’in-884 iha fasilidade ne’ebé estadu prepara no na’in 74 mak halo autokonfinamentu.

“Informasaun seluk ne’ebé Sentru Integradu Jestaun ba Krize hanoin importante atu hato’o ba públiku maka iha konfinamentu obrigatóriu na’in 958, hosi ne’e na’in 884 iha fasilidade ne’ebé estadu prepara no na’in 74 maka halo autokomfinamentu. Hosi komfinamentu obrigatoriu ne’e loron rua liu ba ita-boot sira rona katak sira balun mós hela iha ró, sira sei mantein nafatin, ita-nia médiku no efermeiru sira sei akompaña nafatin sira hamutuk na’in 30, Rejiaun Autonomu Oe-cusse iha 68 ne’ebé iha komfinamentu obrigatoriu. Hafoin iha Ataúro seidauk halo komfinamentu obrigatoriu, maibé iha mós sira halo autokomfinamentu iha sira-nia uma rasik iha na’in 4 maibé sira passa hotu ona”, hatutan Porta-vóz.

Fonte: Mídia Palácio das Cinzas

Notísia Hotu-Hotu >