Governu Diskute Kona-ba Subsídiu Ba Traballadór Rai-Laran No Rai-Li’ur

Dili, 07 Abríl 2020 - Sekretáriu Estadu ba Formasaun Profisionál no Empregu (SEFOPE), Julião da Silva, Tersa ne’e, partisipa iha reuniaun extraordináriu ne’ebé lidera hosi Ministériu Reforma Legislativa Asuntu Parlamentár (MRLAP) no Ministru Koordenadór Asuntu Ekonómiku (MKAE) Interinu, Fidelis Manuel Leite Magalhães, iha salaun Sosiedade Sivíl, Palásiu do Governu.

Iha inkontru ne’e, deskute kona-ba oinsá mak atu bele fó subsidiu ba servisu na’in sira iha rai-laran no mós rai-li’ur.

“Ohin ami hahú deskuti ona para oinsa maka bele fó mós súbsidiu ba ita nia traballadór sira iha Austrália no Korea do Súl. Ba traballadór rai-laran nian ohin ami deskuti hela, tanbá sei iha problema lubuk ida, maibé situasaun ida ne’e ita hamosu nune’e ba futuru obriga ema hotu-hotu tenki rezistu ona iha seguransa sosiál”. informa Julião.

Tuir planu, programa ne’e sei aprezenta ba Konsellu Ministru hodi hetan apresiasaun no Governante no espera sei bele hetan aprovasaun.

Enkontru ne'e partisipa hosi Ministra Solidaridade Sosiál no Inklusaun Armanda Berta dos Santos, Ministru Ensinu Superiór no Kultura Longinhos dos Santos, Ministru Obras Públika Salvador Soares dos Reis Pires, Ministru Transporte no Komunikasaun José Agustinho da Silva.

Fonte: Mídia Secretariado de Estado para Formação Profissional e Emprego (SEFOPE)

Notísia Hotu-Hotu >