Fidelis: Informasaun Apoiu $100.00 Hosi Governu Ba Kada Família Ne’e Seidauk Iha Aprovasaun

Dili, 09 Abríl 2020 – Ministru Reforma Lejislativa no Asuntu Parlamentár (MRLAP), Fidelis Magalhaes, klarifika katak planu apoiu hosi Governu ba kada família no traballadór sira ne’e foin mak halo aprezentasaun de’it, no seidauk iha aprovasaun.

“Ha’u hakarak klarifika asuntu kona-ba apoiu governu nian ba uma-kain sira no ba traballadór sira. Ohin, ha’u foin halo aprezentasaun ba Konsellu Ministru hafoin rekolla proposta hosi liña ministeriál sira. Seidauk iha aprovasaun. Ami tenke ajusta regulamentu no aumenta tan pontu balu, mak sei aprezenta fali hodi halo desizaun iha reuniaun Konsellu Ministru semana oin. Ohin ha’u mós la ko’alia ba mídia depois de reuniaun Konsellu Ministru. Maibé, ohin loraik ajénsia Lusa mesak mak husu konfirmasaun”, dehan Fidelis.

MRLAP hatutan katak informasaun ne’ebé mídia foti ne’e hosi komunikadu imprensa ne’ebé fó sai katak iha aprezentasaun kona-ba medida apoiu refere, maibé iha komunikadu imprensa ne’e la temi aprovasaun.

“Buat ne’ebé mídia foti, sira foti hosi komunikadu imprensa ne’ebé Konsellu Ministru fó sai ne’ebé dehan katak halo duni aprezentasaun. La temi aprovasaun. Notísia ne’ebé Jornál fó sai ne’e ladún loos no iha distorsaun uitoan. Bele halo ema komprende sala”, hatutan MRLAP.

Fonte: Mídia Ministério da Reforma Legislativa e Assuntos Parlamentares (MRLAP)

Notísia Hotu-Hotu >