Rumór Barak Mosu Katak Líder Supremu Korea Norte Kim Jong-un Mate Tiha Ona

Dili, 26 Abril 2020 - Rumór barak mosu katak líder supremu Korea Norte, Kim Jong-un mate tiha ona, oras ne’e espalla tebes iha mídia online hosi nasaun balu, ida ne’e relasiona ho informasaun kona-ba Kim nia kondisaun saúde ne’ebé dehan todan tebes.

To’o oras ne’e laiha deklarasaun ofisiál ida hosi parte relevante kona-ba Kim nia kondisaun reál.

Mídia NY Post sita katak rede transmisaun ida hosi Hong Kong hateten fonte konfiável informa Kim mate ona.

Jornál ida iha Japaun informa katak Kim iha hela kondisaun vegetativa nia laran ka la hatudu sinál konsiente ruma hosi nia.

Fonte hosi Partidu Komunista iha Beijing hateten katak kondisaun Kim Jong-un aumenta la di’ak tanba iha sala balu hosi médiku wainhira halo operasaun ba nia.

Informasaun ida ne’e orijinalmente mai uluk hosi intelijente Amérika ne’ebé dehan Kim iha kondisaun krítiku nia laran hafoin hala’o operasaun fuan iha loron Tersa liubá (21/4).

Konsellu Seguransa Nasionál Estadus Unidus Amérika (EUA) no Eskritóriu Diretór Interlijénsia Nasionál EUA rekuza atu halo komentáriu kona-ba informasaun ne’e. Hanesan mos ho Ajénsia Sentrál Intelijénsia EUA, Departamentu Relasaun Exteriór EUA no Korea Súl lakohi fó komentáriu.

Prezidente EUA Donald Trump, afirma katak rumór sira kona-ba kondisaun krítiku Kim ne’e laloos. Maibé Trump la indika fonte informasaun ne’ebé nia hetan.

Fonte hosi Daily NK, hateten katak Kim hala’o operasaun iha 12 Abril iha Ospitál Hyangsan no iha hela prosesu rekoperasaun nia laran.

Fonte: CNN Indonesia

Notísia Hotu-Hotu >