MS Hahú Distribui Sasán Médiku Ne’ebé Governu Xina Oferese Ba Munisipiu Sira

Dili, 5 Maiu 2020 - Ministériu Saúde (MS), liuhosi Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, akompaña hosi Diretór Administrasaun, Rekursu Umanu no Finansa, Fransisco Borges no Xefe Farmásia hala’o distribuisaun ekipamentu Protesaun Pesoál (sigla inglés, PPE) médiku nian ba iha Sentru Saúde munisípiu 12 inklui RAEOA, iha edifisiu SAMES Aitarak-Laran, Dili.

Diretór SAMES hateten katak prosesu distribuisaun ekipmentu PPE ne’ebé distribui ne’e hanesan ekipmentu sira ne’ebé mak hetan doasaun hosi Povu no Governu Xína. No prosesu distribuisaun ekipmentu sira ne’e nu’udar programa kontinuasaun ne’ebé durante ne’e SAMES halo hela.

“Ekipamentu sira ne’ebé maka ohin ita atu distribui mak Personal Protection Equipment kompostu hosi ókulu, Thermometer Scanner, Luvas, Máskara, roupa proteje isin-lolon, no kobre sapatu, ida ne’e mak ohin ita halo distribuisaun bazeia ba planu ne’ebé mak servisu hamutuk ho Ministériu Saúde liuhosi Diresaun Nasionál Servisu Hospitalar no mos Diresaun Nasionál Farmasia no Medikamentu define kuantidade ne’ebé mak ita tenke halo distribuisaun”, hatutan Santana Martins.

Ekipamentu sira ne’e iha SAMES rasik halo ona desinfektasaun durante loron hirak nia laran wainhira distribui ba iha sentru saúde sira. Prosesu sira ne’e SAMES halo bazeia ba konfirmasaun ho Organizasaun Mundiál ba Saúde (OMS).

Fonte: Mídia Palácio das Cinzas

Notísia Hotu-Hotu >