Paixão: Maske La Autoriza Hosi PPN, PNTL Tenke Intervein PN Karik Mosu Krime

Dili, 19 Maiu 2020 - Ministru Defeza no Seguransa Interinu, Filomeno Paixão iha sorumutuk ho Prezidente Repúblika, Francisco Guterres Lú Olo, hateten katak orientasaun Komandu Polísia Nasionál Timor-Leste (PNTL) nian mak tenke asegura Parlamentu Nasionál funsiona ho normalidade.

PNTL asegura Parlamentu Nasionál (PN) iha parte laran no iha li’ur atu órgaun estadu ne’e bele funsiona ho normalidade.
Bazeia ba ezijénsia seguransa ba deputadu sira iha plenária, intervensaun PNTL tenke hetan autorizasaun hosi Prezidente Parlamentu Nasionál (PPN), nune’e, Filomeno informa katak wainhira situasaun krime mosu iha PN laran, PNTL iha obrigasaun hodi tama atu normaliza situasaun.

“Labele to’o situasaun krime, situasaun krime halo dezorden boot iha Parlamentu laran ne’ebé impede funsionamentu Parlamentu nian, ami iha obrigasaun ba atu normaliza situasaun ne’e para Parlamentu funsiona fila-fali”, informa Filomeno Paixão

Paixão fiar katak PN bele funsiona fila-fali no líder sira sei rezolve situasaun polítika atuál. Tanba ne’e, Ministru ne’e husu ba populasaun atu hakmatek iha fatin no fiar ba lideransa nasaun nian no labele kahur problema polítiku nian. Lideransa nasaun ne’e nian iha kapasidade atu rezolve krize tanba Timor-Leste hakat liu tiha ona krize sira seluk ne’ebé akontese iha pasadu.

Fonte: Mídia Presidente da República (PR)

Notísia Hotu-Hotu >