DJPS Husu DNPKK Fó Solusaun Wainhira Mosu Konflitu Iha Pagamentu $100 Ba Komunidade

Dili, 22 Maiu 2020 - Diretór Jerál Protesaun Sivíl (DJPS), Superientendente Polísia, Ismael da Costa Babo hamutuk ho Diretór Diresaun Nasional Prevensaun Konflitu Komunitáriu (DNPKK), António Viegas konvoka enkontru ho pontu fokál servisu DNPKK hosi munisípiu 12 inklui RAEOA iha salaun Ministériu Interiór durante loron rua (21-22/05).

Iha enkontru ne’e, Diretór Jerál Protesaun Sivíl (DJPS), orienta Pontu Fokál Servisu Prevensaun Konflitu nível munisipál sira atu servisu hamutuk ho autoridade lokál no tékniku Ministériu Solidaridade Sosiál no Inkluzaun (MSSI)iha prosesu pagamentu $100 ba kada uma-kain.

“Ita boot sira hanesan Pontu Fokál Servisu Prevensaun Konflitu atu servisu hamutuk hodi kontribui prevensaun ba COVID-19 iha Estadu Emerjénsia. Ho subsídiu ne’ebé Governu atu fahe ba populasaun eziji ita bo’ot sira atu marka prezensa atu apoiu fó solusaun ba komunidade bainhira mosu konflitu ka dezentendimentu ruma” haktuir DJPS, Ismael da Costa Babo.

Diretór Jerál husu ba funsionáriu sira ne’ebé servisu iha área prevensaun no rezolusaun konflitu atu labele prátika interese polítika no arte marsiál iha knaar fatin.

Fonte: Mídia Serviço Relações Públicas de Ministério do Interior

Notísia Hotu-Hotu >